首頁
月經杯 - 初步認識

月經杯 - 初步認識

月經杯初步認識

究竟月經杯係乜東東？

簡單黎講，月經杯係一種穿戴喺陰道內嘅物體，穿戴位置通常比棉條更低，載著（而唔係吸收）你嘅經液。

月經杯有咩好處？

月經杯嘅好處多不勝數，以下只係其中幾個：

親體性強 - 唔會好似棉條導致陰道乾燥，更加唔會引致過敏！
環保耐用 - 唔會好似護墊及棉條對堆填區造成額外負荷，唔會影響海洋及陸地生態，並可以直接回收！
經濟實惠 - 正確使用及保存，一般可以用到3年左右，既慳錢又慳時！
清潔簡單 - 可直接用清水清洗，並用滾水消毒，再使用專用清潔劑清潔、抹乾就掂晒！

想知道月經杯比起護墊及棉條有咩好處，點擊我啦！

用月經杯會唔會痛㗎？

唔會。如果妳嘅月經杯尺寸及穿戴位置都係正確嘅話，咁就應該幾乎感覺唔到佢嘅存在，唔會覺得唔舒服或疼痛。如果仍然覺得不適，有機會係以下原因導致：

不適原因	解決方法
月經杯穿戴位置唔正確	按照品牌嘅月經杯使用指南取出並重新置入月經杯。該使用指南可以喺第5部分下載
月經杯尺寸唔適合妳嘅子宮頸	按照第3部分重新量度妳嘅子宮頸，然後再按照第4部分選擇最適合妳宮頸嘅月經杯
月經杯嘅莖部過長，導致陰道口不適	按照品牌嘅月經杯使用指南修剪月經杯莖部。該使用指南可以喺第5部分下載

記住儘量慢慢黎啊，因為一開始通常都會經歷1至4個星期嘅熟習階段。如果妳您用盡方法，都係覺得唔舒服，可以參考吓第6部分，或者直接聯絡我哋㗎！

真心唔會漏？

唔會。都係嗰句，如果妳嘅月經杯尺寸及穿戴位置都係正確嘅話，咁就毫無滴漏。但係記得喎，點都要經歷一段學習過程先會掌握到月經杯嘅使用方法㗎。

Intimina

如果妳喺使用 Intimina月經杯嘅時候出現滴漏嘅情況，咁好可能係因為 Lily Cup 未喺體內完全打開並同陰道壁形成密封狀態。

建議妳將 Lily Cup移除，再重新插入體內，並按照以下貼士確保 Lily Cup 已經完全打開。插入後：

輕輕按壓月經杯嘅底部（唔係拉環或莖部），然後輕輕轉吓佢。
將手指伸入陰道，然後輕輕咁檢查 Lily Cup外圍，以確保形成密封狀態。
或者試吓新嘅折疊方法黎解決呢個問題。

FemmyCycle 及 Merula

如果妳使用 FemmyCycle或Merula月經杯嘅時候出現滴漏嘅情況，咁好可能係因為外宮頸（即係子宮頸口）冇正確置於月經杯內（見下圖）。

喺插入月經杯之前，用手指揾妳嘅外宮頸位置，然後將月經杯輕輕推向外宮頸位置。
用盆底肌肉向下推嘅同時輕輕轉吓個月經杯。呢個動作有助於將外宮頸定位喺月經杯內。
如果月經杯好容易插入但係唔輕易取出，咁就代表月經杯應該擺放位置正確㗎喇。

貼士：為咗更加安心，喺妳手快快扔走護墊之前，妳可以考慮第一次使用月經杯嘅時候亦加用護墊。如果冇任何滴漏出現嘅話（如無意外應該唔會有滴漏），咁就萬分恭喜，因為妳已經掌握咗月經杯嘅使用技巧，從此可以「杯」葛棉條及護墊，為女強人嘅妳勇奪獎「杯」！

係咪安全先？

係。我哋推薦嘅所有月經杯全部由醫學級矽膠製成，唔單止係低敏性，而且絕不含鄰苯二甲酸鹽（phthalates）、有毒物質、乳膠、漂白劑、纖維或任何刺激性物質。佢哋係為長時間安全穿戴而設，而矽膠嘅無孔表面安全衛生，仲唔會滋生細菌添。

一般黎講，婦科醫生及醫療專家都會認定月經杯為安全嘅。因為月經杯係收集，而唔係吸收經液，所以唔會引起陰道乾燥或刺激。月經杯亦唔會影響陰道嘅 pH 值，所以亦大大降低感染嘅機會㗎。

儘管係咁，我哋強烈建議妳讀吓第7部分，因為使用月經杯之前都有幾樣需要注意嘅事項㗎。

回到月經杯貼心指南

月經杯 - 初步認識